Sir 9

a9.1Dag 5.12-15

Wali baba mandagi birulene mana ngago ogo

1 Í̠ one bedagohondo ko birabe toba howa mini ko nawibe. Í̠nime biawai haregola ibuguabi nde í̠hondo ko bialu kebe toba holebirago nabibe. ^a 2 Wali mbira bedagome í̠naga hongo bope holigo í̠ni ibuhondo namibe. 3 Wali mbira í̠nenege birule hamelo bedagome í̠ gili lolebirago ibu hangu karia ngola nahabe. 4 Wali mali liaga iba gana lalu dawe haga bedagome í̠naga mini mo batara howa í̠ mo hondo holigo ibu heba mandagi nabirabe. 5 Wandari mabuage bedago í̠na yolo buligo deme hongo howa handaya nahabe. 6 Í̠naga muni mbiraleru bibahende wahai holeberego í̠ bayanda wali baba mandagi holeni nahabe. 7 Tanoha howa hariga bibahendeha de handama ibaga buleni nabibe. Ani bialu hariga wali agali nahe ngagoha hangu pupe halu poleni napobe. 8 Wali bayaleore mbira ibiyagua í̠na ibu deme handaya nahe de handa tara halu pobe. Agali mendeali one baya bedago deme handaya nahabe. Agali mbira ibu one bayale bedago deme hongo howa handaya nahabe. Heneneore agali maru tinaga bu miniha dimagoli holene ira hungu ale bialu kagola ti wali maru bedaru baba ibaga bu haga ka. 9 Wali mbira agali one bedagola mandagi birulene nawigo ibu heba mandagi tomo bayaleru dewa dawa nalu lulu ibaru dewa nalu luluyu biruleni. Ani bederia í̠naga bu mini hongohe ibuha poragola í̠ mo ko halu pi loligo nabirabe.

10 Nenege ala hene biago mani hene kagome bolangua hene ndo holebirago nenege ala hene kago yu wanahabe. Nenege mani hene kago ibu waini iba gahange wabini ngagobi ka. Anigo waini iba lu ngelowa mani nariyagua baya dendebiore wiaga. 11 Wali agali mana ko biaga kagonaga mini yaraga halu mo ko holene mbira agi ibulebirabe í̠ manda nabi kego ainde tinaga mini timbuni yaraga hene kago hondowa dimagoli holeni nahabe. 12 Wali agali tigua turu haga ngagohondo í̠ turu holeni nahabe. Baya hanguore manda bibe. Ti homeneru dindi humbirini andagaha pu nabi wene kaore pani nolene koore ngago abale ngola holebira. 13 Mbiralime í̠ bo waholobada lo manda nabi hole wali agali homelo bo wahaga bu karu baba mandagi holeni nahe putara halu kaundia habe. Anigo ti kagoha kaware piriyagua nde í̠nime poro lalu penedago í̠ni mamage ho habe.Ogo dege manda bibe. Í̠ mbirali mbira gabua uli dewaore ngagoha handa nabi howa pupe halu piagagobi howa wai bialu kagoria bamba halu timu deneni pu hagagobibi holebere.

14 Í̠naga nenege bu karu baya hangu minime mo tale buwa wali mini gigabi bedarunaga mini bayale ngago hale halu mo yabe. 15 Bibahendengi wali agali mini bayalewi bu karu baba te lalu biraga kegoni howa dewangiore te laabo halu Ngode Datagaliwabe Daligaore kagonaga bi mana ngago lolene nga. 16 Wali agali bayale tigabi karu ti dege í̠ andaga tomo nami̱ya ibidaba lalu í̠ni Anduane Homogo ibu andaneha haabo howa ibuni hanguhondo gi ho haabo holene nga.

17 Agali anda biaga kago ibu biabe bayale ibuni biragome ibunaga mini mo yaribia ho halu agali haguane bu karu ti tinaga bi bayale laragome tinaga mini timbuni mini lene ka lene haga. 18 Wali agali tini dindi anda wiyadagoha haga karu ti wali agali bameore bi kulukala lalu kudaga haga kago gi halu wali agali bi galone ndo ngago lalu karia ti handabe manga haga ka.